“Кока-Кола” компани өнөөгийн бидний мэдэх Санта Клаусыг бүтээхээс өмнө Гэгээн Николаус час улаан хослол өмссөн байдлаар олон зураг, нийтлэлд нийтлэгддэг байж. Гэсэн хэдий ч “Кока-Кола” компанийн сурталчилгаа нь бидний мэддэг, бидний хайрладаг хөгжилтэй дүрийг төлөвшүүлэхэд ихээхэн чухал үүрэг гүйцэтгэсэн байдаг.
1931 онд Швед-Америк гаралтай зураач Haddon Sundblom “Кока-Кола” компанийн зул сарын баярын сурталчилгаанд зориулж, Санта Клаусын зургийг зурахаар болжээ. Үүнээс өмнө Санта Клаусыг маш олон янзаар буюу өндөр, туранхай, намхан, эсвэл бүр аймшигтайгаар дүрсэлдэг байсан гэдэг. Тэрээр Сантаг ягаан хацар, цагаан сахал, гялалзсан нүд, мишээсэн царайтайгаар анх дүрсэлсэн бөгөөд түүнийгээ “Дулаахан бөгөөд аз жаргал мэдрэгдсэн дүр” хэмээн тодорхойлсон байдаг. Энэхүү дүр төрх нь олон хүнийг байлдан дагуулж, уг сурталчилгаа дэлхий даяар тархах тусам Хойд туйлын хамгийн алдартай оршин суугчийн талаарх ойлголт тэр чигтээ өөрчлөгдсөн юм.